විෂය ප්‍රදේශ ඉක්මවා රාජ්‍ය පාලනයට අකුල් හෙළීම

කතුවැකිය
Typography

බුද්ධාගමට ප්‍රමුඛ තැන ලැබිය යුතුය යන වගන්තිය මුල්වරට ලංකාවේ ආණ්ඩුක්‍රම ව්‍යවස්ථාවට එක් වූයේ 1972 ව්‍යවස්ථා සම්පාදනයේදීය. පෙඩරල් පක්ෂය එහි දී මෙම යෝජනාවට විකල්පව වැදගත් යෝජනාවක් ගෙනාවේය. එය නම් ලංකාව නම් වූ රාජ්‍යය සියලු ආගම්වලට සමානව සලකන ලෝකායත රාජ්‍යයක් විය යුතුය යන සංශෝධනය ය. එහි දී පෙඩරල් පක්ෂය ඉදිරිපත් කළ යෝජනා ප්‍රතික්ෂේප කෙරිණි. විශේෂයෙන්ම සිංහලෙන් නීති පැනවිය යුතුය. එම නීති දෙමළ බසට පරිවර්තනය විය යුතුය යන යෝජනාව මෙන්ම දෙමළ භාෂා භාවිතය 1954 අංක 28 දරන දෙමළ භාෂා (විශේෂ විධි විධාන) පනතට අනුව විය යුතුය යන යෝජනා පිළිබඳ පෙඩරල් පක්ෂය ගෙන ආ විකල්ප යෝජනාද එහි දී ප්‍රතික්ෂේප වූයේය. 78 ව්‍යවස්ථාවට ද බුද්ධාගමට ප්‍රමුඛස්ථානය හිමි විය යුතුය යන යෝජනාව කිසිදු වෙනස් කිරීමකින් තොරව අන්තර්ගත කෙරිණි. සිංහල බෞද්ධයන් ලෙස මතුපිටිවාදී තලයක සිංහලකමට සහ බෞද්ධකමට වරප්‍රසාද ලැබීම පිළිබඳ සතුටු විය හැකිය. එහෙත් දැනුවත් සිංහල බෞද්ධයාට මෙම යෝජනා කෙතරම් බිහිසුණු ද යන්න එදා වැටහෙන්නට ඇත.

 

අද ලංකාවේ තිබෙන බරපතළම ප්‍රශ්නය කුමක්ද? ඩෙංගු සහ සයිටම් එකටත් වඩා රටේ තිබෙන ප්‍රශ්න පැටලුණු නූල් බෝලයක් බවට පත් කරනු ලැබ ඇත්තේ ගෞරවණීය මහා සංඝරත්නය විසින් යැයි කිව හැකිය. නව ව්‍යවස්ථාවක් එපා යනුවෙන් උන්වහන්සේලා රටේ දේශපාලන නායකයන්ට අනිසි ලෙස මෙන්ම ව්‍යවස්ථා විරෝධී ලෙස බලපෑම් කරති. ව්‍යවස්ථාව යනු රටේ මූලික නීතිය බැවින් උන්වහන්සේලා විරුද්ධ වෙමින් සිටින්නේ රටේ මූලික නීතිය යථාරූපී කරනවාටය. ත්‍රෛනිකායික මහ නාහිමිවරු ප්‍රමුඛ මහා සංඝරත්නය මේ ආකාරයට තමන්ගේ විෂයෙන් බැහැරව වදාරන ප්‍රකාශවලින් අවුලට පත් වන්නේ රාජ්‍ය නායකයාය. ඊළඟට රාජ්‍ය පාලන ව්‍යුහයයි.

වර්තමාන රාජ්‍ය නායකයා බලයට පත් වීමට පෙර ජනතාවට පොරොන්දුවක් දුන්නේය. එම පොරොන්දුව නම් රටේ දැවෙන ප්‍රශ්න විසඳන, විශේෂයෙන්ම ජාතික අර්බුදය සමහන් කිරීමට උපස්ථම්බක වන ප්‍රතිපාදන සහිත නව ආණ්ඩුක්‍රම ව්‍යවස්ථාවක් සම්පාදනය කරන බව කීමය. එය ආණ්ඩුවේ සෙසු වැඩකටයුතුවලට සමාන්තර තලයක තබා කරන්නට ජනපති සහ අගමැති පියවර ගත්හ. කෙටුම්පත්වල ඇතුළත් යැයි සඳහන් ප්‍රතිපාදන විටින් විට එළියට ආවේය. තවමත් පරිපූර්ණ ව්‍යවස්ථාවකට යා හැකි අංගවලින් සමන්විතව එක පෙළට තබා පියවරෙන් පියවර සාකච්ඡා කළ හැකි දළ ලියවිල්ලක් ඒ පිළිබඳව ප්‍රසිද්ධ කර නැත. දැන් ත්‍රෛනිකායික නාහිමිවරුන් නව ව්‍යවස්ථාවක් එපා කියන්නේ මන්ද යන්න ප්‍රශ්නයකි. එමඟින් දෙමළ අන්තවාදීන්ගේ වුවමනාව ඉටු වෙනවා. බුද්ධාගමට තැන නැතිවෙනවා ආදී වශයෙන් තවත් සමහරු කියන්නේ කොහොමද යන්න ප්‍රශ්නයකි. මෙසේ විවේචනය කරන කිසිවකුත් ව්‍යවස්ථාවේ දළ සටහනක් දැක නැත. ඇත්තටම ව්‍යවස්ථාව මෙය යැයි කියන පිළිවෙළක් සහිත කෙටුම්පතක් තවම ඉදිරිපත් කර නැත.

ත්‍රස්තවාදය වැළැක්වීමේ පනත අහෝසි කිරීමේ යෝජනාව ද අනවශ්‍ය බව මහ නාහිමිවරු කියති. අතුරුදන්වූවන් ගැන සෙවීමට කාර්යාලයක් අනවශ්‍ය බව ද උන්වහන්සේලා කියති. මේ ආකාරයට මහ නාහිමිවරු රටේ හැම කටයුත්තකටම අනුශාසන ඉක්මවා යන මට්ටමින් අත පොවන්නට ගියහොත් මෛත්‍රීපාල සිරිසේන මහතාට නොව කවර නායකයකුටවත් රාජ්‍ය තාන්ත්‍රික න්‍යායන්ට අනුකූලව රට පාලනය කරන්නට නොහැකි වනු ඇත. මෙසේ රාජ්‍ය පාලනයට අදාළ වැඩසටහන් සහ තාන්ත්‍රික කටයුතුවල ආවේණික මාර්ග සිතියම වෙනස් කරන්නට මහ නාහිමිවරුන්ට තිබෙන අතාර්කික බලය කුමක්ද? 72 හා 78 ව්‍යවස්ථාවල බුද්ධාගමට ව්‍යවස්ථාවෙන් හිමි තැන අධිනිශ්චය වීම නම් වූ ප්‍රතිපාදනයද?

උක්ත ව්‍යවස්ථාවලින් බුද්ධාගම අධිනිශ්චය කරනවා වෙනුවට රාජ්‍යය අනාගමික රාජ්‍යයක් බවට පත් කිරීම පිළිබඳ වගන්තියක් ඊට ඇතුළත් වූවා නම් රටේ ප්‍රශ්න මේ තරම් ඔඩුදුවන්නේ නැත. රාජ්‍ය පාලනයෙන් ආගම දුරස් කර තැබීම රටේ සංස්කෘතියක් බවට පත් විය යුතු තත්ත්වයකි. එහෙත් මුල සිටම එසේ නොවීමෙන් සංඝයා වහන්සේලා සිය විෂය ප්‍රදේශ ඉක්මවා තාන්ත්‍රික කටයුතුවලට අතපොවන තත්ත්වයක් උදා වී තිබීම ජාතියේම ඛේදයට හේතුවකි.

ව්‍යවස්ථාව හා ආගම අතර සම්බන්ධය අහෝසි කිරීමට රටට ආකල්පමය වෙනසක් අවශ්‍යය. මීට ආරම්භයේ දී ජාතිවාදී හා ආගම්වාදී කොටස් විරුද්ධ වන්නට පුළුවන. විශේෂයෙන්ම ඒ උපකරණ දෙකෙන් ගොඩ යන්නට මාන බලන රාජපක්ෂ කල්ලිය මහා සංඝ රත්නය සමඟ මේ යෝජනාවට එරෙහිව අවි අමෝරා ගැනීම ඉර හඳ සේ විශ්වාසය. මේ නොකල්පනාවට විකල්පව කල්පනාවෙන් දිවි ගෙවන ජනයා කළ යුත්තේ ආගම සහ රාජ්‍ය පාලනය වෙන වෙනම පැවතීම වඩා ප්‍රායෝගික බව තේරුම් ගැනීමය. නැතහොත් සිදුවන්නේ ආගමික නායකයන් රටේ හැම දේකටම අත පොවා ජනයාගේ ලෞකික ලෝකය විනාශ මුඛයට යැවීමය. යම් හෙයකින් සිංහල බෞද්ධයන් රටේ සුළුතරය වී, හින්දු හෝ මුස්ලිම් බහුතරය වී එම ආගම් විසින් ව්‍යවස්ථාවට අනපනත් පටවනවාට බෞද්ධයන්ට එකඟ විය හැකිද? නොහැකිය. කිසිදු ආගමක් ඒ කාර්යය කළ යුතු නැත. ව්‍යවස්ථාව අද නොවේ හෙට ගෙනෙන්නට කියන්නට කිසිම ආගමකට හෝ ආගමික නායකයන්ට අයිතියක් නැත. මන්ද එය ජනතාවගේ හා ඔවුන්ගේ නියෝජිතයන්ගේ වැඩකි. ලෝකායත රාජ්‍යයේ වැඩකි.

මහා සංඝරත්නය කැපවී සිටින්නේ ලෞකිකත්වයේ අරගල වෙනුවෙන් නොවේ. උන්වහන්සේලා ජීවිත කවුළු හැරගත යුත්තේ ලෝකෝත්තර සුවය දෙසටය. මේ යථාව කනපිට හරවා පෙර ව්‍යස්ථා සම්පාදකයන් කළ මුග්ධ විපරිතය නව ව්‍යවස්ථා සම්පාදකයන් නොකළ යුතුය. නව ව්‍යවස්ථා සම්පාදකයන් රට පත්වෙමින් තිබෙන ආගමිකකරණය පිළිබඳ අවුලෙන් රටත් ජනතාවත් ගලවා ගැනීමට ධෛර්ය සම්පන්න විය යුතුය.

Latest Posts

කතාබහ

අපි කාගේවත් දුරකථන ටැප් කරන්නෙ නෑ-පොලිස්පති අපි කාගේවත් දුරකථන ටැප් කරන්නෙ නෑ-පොලිස්පති 2018-01-17 - ලංකාවේ කිසිදු ස්ථානයක තමන් දැනුවත්ව දුරකථන ටැප්...
අල් කුර්ආන් කියන්නේ නීති පොතක් නෙවෙයි අල් කුර්ආන් කියන්නේ නීති පොතක් නෙවෙයි 2017-12-22 - ජාමියා නලීමියා උසස් අධ්‍යාපන ආයතනයේ හිටපු ජ්...
මේ මැතිවරණයේ දී අන්තවාදයට හොඳ පිළිතුරක් දෙනවා මේ මැතිවරණයේ දී අන්තවාදයට හොඳ පිළිතුරක් දෙනවා 2017-12-20 - උතුරුමැද පළාත් ප‍්‍රධාන අමාත්‍ය පේෂල ජයරත්න&...

විශේෂාංග

අඳබාල නිලධාරීන් නිසා වළපල්ලට යන ග‍්‍රාමීය ආර්ථිකය අඳබාල නිලධාරීන් නිසා වළපල්ලට යන ග‍්‍රාමීය ආර්ථිකය 2018-01-15 - ශ්‍රී ලංකාව තරම් ජීවත් වීමට සුදුසු  පරිසරයක් ...
උඩප්පුවෙන් නැගෙන පාඩුකාරයන්ගේ මාළු සිලිසිලිය උඩප්පුවෙන් නැගෙන  පාඩුකාරයන්ගේ මාළු සිලිසිලිය 2018-01-15 - පාඩුකාරයෝ ගල්පර රහිත නොගැඹුරු මුහුදත්, පළල් ...
සෑම විහිළුවකම අර්ධ සත්‍යයක් තිබේ සෑම විහිළුවකම අර්ධ සත්‍යයක් තිබේ 2018-01-11 - ජනවාරි 9 දා ජනවාරි 08 පිළිබඳව ජනමාධ්‍ය වාර්තා කළ...

කතුවැකිය

ජනපති, අගමැති සහ බැඳුම්කර වාර්තාවේ විවෘතභාවය ජනපති, අගමැති සහ බැඳුම්කර වාර්තාවේ විවෘතභාවය 2018-01-15 - බැඳුම්කර කොමිසමේ වාර්තාව පිළිබඳ ජනපතිවරයාගේ...
ජනපතිගේ ගෙවීයන වසර සහ එළඹෙන වසර ජනපතිගේ ගෙවීයන වසර සහ එළඹෙන වසර 2017-12-27 - ගෙවී යමින් තිබෙන වසරේ සහ එළැඹෙන 2018 වසරේ රටේ නා...
හොඳ පුංචි ඡන්දෙ හොඳ පුංචි ඡන්දෙ 2017-12-20 - 2017-12-17 පුංචි ඡන්දය නමින් හඳුන්වන පළාත් පාලන මැත...

දේශපාලන

දෙව්දත්තර මාවතේ දඩ සිඟා වැඩීමට පසුවදනක් දෙව්දත්තර මාවතේ දඩ සිඟා වැඩීමට පසුවදනක් 2017-09-25 - ලලිත් වීරතුංගට හා අනූෂ පැල්පිටට 20දා මහාධිකරණ...
ගල් ඔයට මින්නේරියට යනවාද - නූතන ලෝකයට යනවා ද? ගල් ඔයට මින්නේරියට යනවාද -  නූතන ලෝකයට යනවා ද? 2017-09-19 - ලංකාව සැලකෙන්නේ කෘෂිකාර්මික රටක් ලෙසිනි. අන්...
අනුක්ත සතුරකුට තර්ජනය කිරීම නිරර්ථකය අනුක්ත සතුරකුට තර්ජනය කිරීම නිරර්ථකය 2017-09-11 - ලංකාවේ පාලකයන් පාලකයාගේ කාර්යභාරය හැර ඇන් සි...
66න් පසු තෙවන ඇසක් විවර කර ගත යුතුය 66න් පසු තෙවන ඇසක් විවර කර ගත යුතුය 2017-09-04 - ශ්‍රීලනිපයට වයස 66කි. ශ්‍රීලනිප සභාපතිවරයා මෙන්ම...

Face Book Setup 01